KA BUKIK MANDAKI, KA LURAH MANURUN
Oleh Hasanuddin Hasanuddin
Alam dicipta dek Allah Swt ado babukik jo ado balurah. Kutiko kito ka bukik pastilah mandaki, kutiko ka lurah pastilah manurun. Karajo mandaki jo manurun mamiliki konsekuensi balainan. Mandaki itu barek, butuh energi nan banyak, samantaro manurun itu ringan tapi paralu kahati-hatian pulo.
Bentang alam bukik jo lurah mainspirasi ninik muyang urang Minangkabau untuak mananamkan kasadaran jo raso empati supayo bakarajo samo, sarato samo-samo marasokan susah jo sanang. Kasadaran tun malahiekan pituah ka bukik samo mandaki, ka lurah samo manurun.
Fakta alam ka bukik mandaki, ka lurah manurun manjadi inspirasi jo iktibar untuak manata kahidupan social, barupo ajaran untuak bakarajo samo atau bakolaborasi: kalau ka bukik, molah samo-samo mandaki kito, jikok ka lurah, molah samo-samo manurun kito.
Pasan nan disampaikan adolah bahaso dalam iduik basamo, kito disuruah untuak samo-samo marasokan sulik sarato bareknyo pajuangan, sarato sanang jo bahagianyo kutiko mandapek nikmat Allah Swt. Untuak itu, molah kito samo-samo bakarajo, bakarajo basamo-samo, bakarajo samo, saliang menolong, sanasib-sapananggungan. Suruahannyo, karajo kareh pantang manyarah, jan pamaleh, karano iduik itu memang mandaki atau barek. Pantangannyo, jan cadiak buruak: kutiko mahadoki tantangan mahandok tapi kutiko manikmati hasil barabuik.