KATIKO TUNEH INDAK TUMBUAH DI MATO
Oleh, Phillar Mamara
Katiko tuneh indak tumbuah di mato
Buruang tabang malayok-layok
Babenta-benta mancari dahan ka inggok
Sairiang jo kicau, sambia manari mangipak sayok
Hinggok di dahan jo girang hati
Paruah mangganggam buah ranum
Maangguak manggesekan kapalo ka pijakan kaki
Malakok bijo baganti hari
Katiko tuneh indak tumbuah di mato
Bijo batuneh baaka lai
Tumbuah di dahan pangka rantiang
Dek dahan gadang badaun labek
Tuneh dirawat dipaliharo
Walau tumbuah indak di matonyo
Katiko tuneh indak tumbuah di mato
Aka manggigik mamaluik dahan
Taraso sasak indak takiro
Rantiang jo daun ikuik mandarito
Katiko tuneh indak tumbuah di mato
Dahan jo rantiang lah baganti rupo
Daun jo buah mangikuik pulo
Sansaro batang ka maa dikato
Sasa kudian indak paguno.
Padang, November 2023