Nan Bana
Oleh Hasanuddin Hasanuddin
Tantu kito sadonyo alah mangatahui sosok Ali bin Abi Thalib. Baliau adolah anak bunsu dek apak (paman) Nabi Kito Muhammad Rasulullah Saw, nan banamo Abu Thalib. Di sampiang itu, Baliau adolah minantu Rasulullah Saw sarato manjadi Khalifatu ar Rasyidin nan kaampek sasudah Abu Bakar as Shiddiq, Umar bin Khattab, jo Utsman bin Affan.
Ali ko sahabat nan bagak sajak ketek. Inyo nan manggantikan Nabi ukatu ka pai hijrah ka Madinah. Kutiko tu rumah Rasulullah dikapuang dek urang Kapie Quraisy nan andak mambunuah Nabi. Tapi, qadarullah, Nabi salamaik dan urang Kapie Qurays takicuah dek Ali. Mareka manyangko Nabi masih lalok. Tapi kutiko nyo nak manangkok, ruponyo nan lalok di tampek tidua Nabi tu adolah Ali bin Abi Thalib.
Sekali waktu Ali bin Abi Thalib ditanyo dek para sahabat.
“Wahai Ali, si Fulan mengecekkan bahaso inyo nan bana, sedangkan si Fulin juo manyatokan bahaso inyo nan bana. Baitu pulo nan lain. Padohal, kok ditiliak hakikat dari klaim-klaim mareka tu balain surang-surang. Paniang kami, maa nan kadituruik?”
Jawek ali bin Abi Thalib singkek sajo.
“Kenali kabanaran, sainggo kalian tau sia urang nan bana (maikuti kabanaran tun). Bana indak diukua dek urang-urang tapi manusialah nan diukua jo kabanaran.”
Parsoalan nan kito hadoki kini adolah masalah “nan bana” iko bana. Apolai majalang sagalo bantuak pamiliahan pamimpin, baiak di lingkuang nan ketek sarupo pamiliahan wali korong jo wali nagari, atau pun nan manangah samisal pamilihan bupati, walikota, dekan, rektor, atau gubernur. Atau, nan labiah gadang, pamiliahan presiden jo wakie rakyat.
Sado balon pimpinan tun kamanjua janji sarato mangklaim paliang bana. Baitu pulo lawan-lawannyo, isu kabanaran pulo nan dianjuangannyo. Dima kito katagak? Mungkin nasihaik Ali bin Abi Thalib di ateh patuik manjadi padoman.
Namun, parsoalan barikuiknyo adolah “Baa caro mangenali kabanaran tun?”
Ado tigo mato aia kabanaran nan salaruik salamo nangko banyak ditimbo dek urang-urang ahli hikmah, iyoalah sabagi barikuik.
Partamo, agamo. Kabanaran agamo iyolah mutlak, itulah nan bana sandirinyo, nan disabuk dalam Al Quran “Al haqqu min Rabbika”. Itulah kabanaran nan hakiki, manyangkuik aqidah (kaimanan kapado Allah Swt), syariah (katantuan hukum nan digarihkan dek Allah Swt), sarato muammalah (tata aturan hubuangan di antaro sasamo manusia sarato alam). Kabanaran dari katantuan Allah Swt tun mutlak, dianjak indak layua dibubuik indak mati. Tugeh kito, samia’na wa atha’na.
Kaduo filsafat. Filsafat ko iyolah hasie olah utak manusia, pamikiran nan taratur mandalam sarato kritis. Kabanarannyo relatif, dek karano maandalkan utak rasional. Kritis disiko indak baarti suko mangaritik, tapi mampatanyoan taruih tantang sasuatu nan dipikiakan tu. ‘Alam takambang jadi guru’ adolah salah satu bantuak filsafat Urang Minangkabau. Baitu juo ‘Adat basandi syarak, syarak basandi kitabullah’ juo bisa dikategorikan ka filsafat. Kabanaran filsafat tun ditarimo dek aka nan sihaik. Tapi paralu diingek, filsafat ko mangawang-ngawang, ‘bananyo taraso tapi ujuiknyo indak dapek dipacik’.
Katigo ilemu atau pangatahuan ilmiah. Ilemu ko bukan kapandaian capak-capak baruak. Tapi, ilemu adolah pangatahuan nan kabanarannyo diuji jo duo alaik nan ado pado diri manusia, iyolah utak logis (pamikiran nan rasional) jo bukti empirik (fakta nan bisa ditangkok dek panca indera). Kaidah mungkin (asumsi/ hipotesis) jo alua (prosedural pembuktian) tapakai disiko. Babedo dari filsafat, ilemu ko ‘bananyo taraso ujuiknyo dapek dipacik’.
Labiah jauah, Adat Minangkabau manggarihan bahaso kabanaran tun harus pulo mamanuhi kriteria ‘patuik’. Nan mungkin, jo tapanuhi syarat alua, alun bana kalau dipandang indak patuik (iko malampaui paradigma positivisme dan alah masuk ka ranah teori sosial kritis). Jadi, bana tu iyo panjalasan nan masuak aka, ado bukti faktual-empirik, dan mamanuhi asas kapatutan. Ukuran ‘patuik’ tu ditialiak dari sisi moral, sopan santun, atau dampaknyo kapado masyarakaik atau di maso akan datang.
Nan bana tu akienyo memang badiri sandirinyo. Kok itam inyo tahan tapo, kok putiah iyo tahan sasah, luruihnyo tahan tiliak, ibaraik ameh iyo tahan sapuah. Jikok kito alah tau atau kenal “nan bana” mako kito akan bisa maliek sia sajo nan maikuti kabanaran tun.
Urang nan tau di nan bana akan arif-bijaksano: inyo akan tau di rantiang nan kamancucuak, tau di unak nan kamanyangkuik, tau diangin nan bairu, tau di bayang kato sampai. Wallahu alam bi ssawaab.