Tingkatan Kakarabatan Minangkabau
Oleh Hasanuddin Hasanuddin*
Alah dicuraipapa pado artikel tadaulu bahaso Urang Minangkabau “basuku ka induak banasab ka Bapak”. Tasabab itu mako di Minangkabau dikatahui duo macam kaluarga, yoitu “kaluarga komunal atau kaum” jo “kaluarga batiah atau inti”. Kaluarga komunal atau kaum (extended family) tabantuak manuruik garih induak sadangkan kaluarga batiah atau inti (nucleous family) tabantuak menuruik garih bapak.
Anak-anak kito kini, sabagian anyo tau nan manjadi kaluarga inyo anyolah ayah, induak, sarato adiak atau kakak, baiak laki-laki maupun padusi. Itu artinyo, mereka anyo tau jo keluarga batiah atau kaluarga inti.
Kaluarga batiah atau kaluarga inti (nucleous family) disabuik kaluarga ketek. Isinyo anyo 2 (duo) generasi, yoitu Bapak/ Ayah, Induak/ Mande, jo anak-anak mereka. Nan manjadi Kapalo Kaluarga iyolah Bapak.
Tapi lai tau kolah mereka jo kaluarga kaum atau kaluarga laweh (extended family)? Iyolah kaluarga matrilineal Minangkabau nan maikek urang-urang nan sakaturunan garih induak tu dalam sabuah kaluarga?
Kaluarga kaum disabuik juo kaluarga komunal atau laweh. Baa mangko laweh? Karano kaluarga tu bakakambangan sahinggo sacaro kumulatif malaweh ka sampiang suok-kida. Kadudukan kaluarga tu pun batingkek-tingkek. Tingakatan kaluarga nantun adolah sabagai barikuik.
Kaluarga nan paliang ketek disabuik “samande” atau “sainduak”, iyolah kasatuan kaluarga nan tadiri dari induak jo anak-anaknyo sajo. Urang nan manjadi kapalo kaluarga adolah Mande. Bandiangkanlah duo bantuak kaluarga paliang ketek dari sistem kakarabatan nan balainan, yoitu kaluarga batiah (patrilineal) jo kaluarga samande (matrilineal), sarupo gambar di bawah ko.
Tingkek kaduo, iyolah kaluarga “sajurai”, gabungan babarapo kaluarga “samande”, tadiri dari surang anduang (nenek), anak-anak anduang (para induak jo sudaro laki-lakinyo), sarato anak-anak dari induak-indauk (indak tamasuak anak sudaro laki-laki dari induak). Jadi, kaluarga sajurai ko tadiri ateh tigo generasi. Urang nan Kapalo kaluarga sajurai adolah mamak, yaitu sudaro laki-laki induak nan tatuo atau nan dituokan.
Di ateh “sajurai” disabuik “saparuik”, iyolah gabungan babarapo kaluarga “sajurai”, dipimpin dek tungganai (Laki-laki tatuo atau dituokan di antaro mamak). Aratinyo, “saparuik” ko tadiri dari ampek generasi: yoitu: niniak, babarapu anduang (nenek), banyak induak, sarato anak-anak mereka.
Gabuangan dari babarapo kaluarga “saparuik” dikatokan “sakaum”, adolah gabungan babarapo kaluarga “sparuik”, dipimpin dek surang mamak kaum.
Kaluarga “sasuku”, adolah gabungan dari babarapo kaluarga “sakaum”, dipimpin dek surang pangulu nan bagala Datuak. Urang sasuku ko adolah turunan dari (6) anam generasi. Gambaran sistem kakarabatan Minangkabau nan batingkek-tingkek, dari nan paliang ketek sampai nan paliang gadang tu adolah sabantuak digambarkan di bawah ko.
Masih adoko kaluarga di ateh sasuku? Ado! Suku-suku nan sakaturunan dalam sabuah nagari disabuik “sapayuang”. Kapalo dari suku-suku sapayuang adolah pangulu tuo/ pangulu pucuak.
Di ateh sapayuang pun masih ado. Urang-urang nan sakaturunan tapi alah tapisah salamo 7 (tujuah) generasi dan manampati nagari-nagari nan balain, disabuik “saindu”. Hubungan urang-urang nan saindu bisa jo patuik ditalusuri. Jo caro itu silaturrahim (tali rahim, tali sakaturunan garis induak) akan bisa paarek baliak di maso nan ka datang.
Jadi, kaluarga matrilineal tu memang laweh dan batingkek-tingkek. Dek ciek kaluarga matrilineal nan utuh tu iyolah ciek suku, pamimpinnyo ciek iyolah pangulu (bagala datuak), mako paliang kurang ciek kaluarga tu tadiri dari 6 (anam) generasi. Gambaran kaluarga sakaturuan garis induak nan sasuku, dibangun dari samande, sajurai, saparuik, jo sakaum; kalurga sasuku dipimpin dek surang pangulu nan bagala Datuak, iyolah bantuak bagan di bawah ko.
Dari paparan di ateh, tampak tingkatan kakarabatn di Minangkabau. Urang-urang nan sasuku itu adolah sakaluarga, urang nan badunsanak. Dek sakaluarga mako urang Minangkabau bapantang kawin sasuku.
Mudah-mudahan jo panjalasan nan taurai cando iko batambah murah guru manjalehkan sarato batambah murah pulo anak-anak kito mamahami baa bana nan badunsanak tun.
*) Panulih adolah dosen Sastra jo Kajian Budaya Minangkabau UNAND